خلیجی بحران کے باعث پاکستان اسٹاک ایکسچینج میں شدید مندی اور انڈیکس میں بڑی گراوٹ

کراچی ( لیبر نیوز صنعت، تجارت ڈیسک ) خلیجی خطے میں بڑھتی ہوئی فوجی کشیدگی اور توانائی کی تنصیبات پر حملوں کے باعث پاکستان اسٹاک ایکسچینج شدید مندی کی زد میں آگئی ہے۔ جمعرات کو کاروبار کے دوران بینچ مارک 100 انڈیکس میں 1500 سے زائد پوائنٹس کی بڑی کمی ریکارڈ کی گئی جس کے بعد انڈیکس 152740 کی سطح پر بند ہوا۔ مارکیٹ ذرائع کے مطابق اسرائیل اور ایران کے درمیان جاری حالیہ تنازع نے سرمایہ کاروں کو شدید بے چین کر دیا ہے جس کی وجہ سے حصص کی فروخت کا رجحان غالب رہا۔

اسٹاک مارکیٹ میں گراوٹ کی بڑی وجہ خلیج میں توانائی کے مراکز پر ہونے والے حملے ہیں کیونکہ قطر پاکستان کو گیس فراہم کرنے والا سب سے بڑا ملک ہے اور وہاں کی تنصیبات کو خطرہ پہنچنے سے پاکستان کی توانائی کی سلامتی براہ راست متاثر ہو سکتی ہے۔

عالمی منڈی میں خام تیل کی قیمتیں بھی 97 ڈالر فی بیرل سے تجاوز کر گئی ہیں جس کے اثرات مقامی مارکیٹ کے تمام اہم سیکٹرز پر دیکھے گئے۔ بینکنگ، سیمنٹ، تیل و گیس اور کھاد کے شعبوں میں حصص کی قیمتیں گرنے سے مجموعی سرمایہ کاری میں کمی واقع ہوئی ہے۔ ماہرین کا کہنا ہے کہ جب تک خطے میں امن کی صورتحال واضح نہیں ہوتی اسٹاک مارکیٹ میں غیر یقینی کی یہ صورتحال برقرار رہ سکتی ہے۔

خبریں پرنٹ کریں